Jakkafatajóga?

Áhættumat er lögbundin skylda á öllum vinnustöðum og mikilvægt tæki í forvörnum gegn sálfélagslegum áhættuþáttum. Það má líta á það sem hluta af sálrænni öryggisstefnu vinnustaða. Því miður hafa fáir vinnustaðir tekið þetta skref og í mörgum tilfellum grípa þeir aðeins til aðgerða þegar vandamálin eru orðin veruleg og kostnaðarsöm.

Streita er að sjálfsögðu eðlilegur hvati við verkefnavinnu, en þegar álag verður of mikið eða viðvarandi vegna óheppilegra starfsaðstæðna getur það valdið alvarlegum heilsufarsvandamálum. Sumir vinnustaðir hafa brugðist við með því að bjóða starfsmönnum upp á jakkafatajóga í hádeginu eða í kaffitímum. Þó það geti verið gagnlegt að teygja úr sér og hreyfa sig, sérstaklega þegar unnið er við skrifborð allan daginn, þá leysir það ekki undirliggjandi vandamál. Það er hvorki þægilegt né raunhæft fyrir flesta að stunda jóga í vinnufatnaði, og mikilvægara er að bregðast við orsökum streitu heldur en að reyna að milda einkennin.

Jakkafatajóga er gott dæmi um skammtímalausn sem endurspeglar oft vanþekkingu stjórnenda á sálfélagslegum þáttum í starfsumhverfinu. Slík úrræði draga hvorki úr streitu né koma í veg fyrir kulnun. Ég hvet vinnustaði eindregið til að horfa inn á við og meta sálfélagslega áhættu af fullri alvöru með skipulögðu áhættumati. Með því má ekki aðeins bæta líðan starfsfólks heldur fyrirbyggja langtíma veikindi, auka starfsánægju og styrkja heildarafköst vinnustaðarins.“

 

Skrár tengdar þessari bloggfærslu:

• jakkafatajoga.jpg